Conselh de la Joventut d’Òc

I sèm!

Fa un moment que n’ausissiatz parlar d’aquel projècte de lançar de preservatius en occitan. Dempuèi la jornada del Total Festum a Montpelhièr lo 27 d’octobre, los preservatius 100% occitanofònes son ara oficialament lançats. Avèm fach un primièr tiratge de 4000 preservatius emballats polidament per una pocheta facha per la marqua Adishatz.

Aqueles preservatius son distribuits gratuitament pendent de manifestacions ont lo Conselh de la Joventut es present. Las associacions que ne fan la demanda pòdon tanben aver d’aquelas capòtas a distribuir. Demandam sonque qu’aquela distribucion se faga de cap a de joves, e se possible de far un resson mediatic d’aquela distribucion. Aquó nos permet d’aver de retorns e sustot de mostrar de l’eficacitat de la campanha per la tornar lançar e aver d’ajudas tornamai.

Vist son succès, lo primièr tiratge dels preservatius será d’en primièr per las associacions membres del Conselh de la Joventut. E Òc, es pas per se far daurar la codena, mas avèm agut un brave succès...

E sustot, nos sèm plan amusat amb aquó al Total Festum : grand talhièr de plegatge de las pochetas plan convivial. Los preservatius son partits coma de pichons pans. Cal dire que los vièlhs montpelhierencs son piégers que los avairineses quand s’agís d’aver quicòm gratuitament. N’i a plan que passèron mai d’un còp per s’emplir las pòchas, amb lo pretèxte “Es per mon pichon filh!”. Una mameta i anèt francament en nos demandar se avián pas un modèl amb de balenas, qu’aquò ajudariá plan son paure vièlh. Plan de joves, eles diguèron qu’esperavan de poder se’n servir lo ser meteis... d’unes èran talament preissats que esperavan pas que sián emballadas las capòtas! Mas los joves son fin finala plan assabentats sus aquelas causas per rapòrts a un fum de vièlhs que cresián de se servir d’un paquet d’aluquetas. Una quita femna en veire marcat “Condomi Nature” nos demandèt se podiá tastar aquel bonbon.

I a de trabalh de far, brave monde!

Aqueles preservatius son pas qu’un trocet d’una campanha de prevencion contra las Malautiás Sexualament Transmissiblas. Son acompanhats doncas:
 d’afichas,
 de prospectus explicant los diferents risques dins una relacion sexuala non protegida... e un lexic de basa en occitan dins d’unas circontàncias...
 d’una expausicion mostran l’occitan coma vector cultural de l’amor dempuèi l’Edat Mejana amb de citacions literàrias suls biais d’exprimir sos sentiments, los diferents dangièrs d’una relacion sexuala non protegida e los diferents mejans de se protegir.

Atencion ! Aquel preservatiu es reservat a un usatge exclusivament occitan ! Lo Conselh de la Joventut se reserva lo drech de venir verificar de sa bona utilizacion.