Conselh de la Joventut d’Òc

Preambul : La declaracion universala dels dreches de l’òme

Lo Conselh de Representacion Generala de la Joventut d’Òc recampa, a travèrs los joves, las organizacions que trabalhan al manten e al desvolopament de la lenga e de la cultura occitanas, d’Òc. A per tòca :
 de presentar ambé mai de pes las reivendicacions comunas de sos membres ;
 d’èsser l’interlocutor privilegiat de las collectivitats territorialas, dels estats, de las organizacions e dels òmes politics, de las autras organizacions de joves etc.

ARTICLE 1
Las organizacions de joves aderentas, reconeisson l’existéncia, dels Alps als Pirenèus en passant per la màger part Sud del Massís Central, d’un territòri singular caracterizat per una lenga e una cultura pròpias.

Aquela lenga se pòt nommar indiferentament, per òrdre alfabetic, lenga d’Òc o occitan. Li direm « lenga nòstra » dins la seguida de la presenta carta.

Aquel territòri se pòt nommar, per òrdre alfabetic, Occitània, País d’Òc, Païses d’Òc. Li direm « País Nòstre » dins la seguida de la presenta carta.

ARTICLE 2
Poiràn pas aderir al Conselh de Representacion Generala de la Joventut d’Òc las organizacions presentant una ideologia o d’actes qu’encoratjarián o pronarián l’inegalitat de las raças, de las religions, de las culturas o de las lengas. En particular, tota organizacion a caractèr racista, neo-fascista o jacobin pòt pas èsser membre del Conselh de Representacion Generala de la Joventut d’Òc.

Las organizacions practicant o encoratjant la violéncia, lo terrorisme, l’irrespècte de la persona umana pòdon pas far partida del Conselh de Representacion Generala de la Joventut d’Òc.

ARTICLE 3
Lo Conselh de Representacion Generala de la Joventut d’Òc refusa de far de discrimacion entre sos membres en foncion de sas pensadas politicas o ideologicas, o encara en foncion de son apartenéncia estatala. Aquel darrièr ponch implica que las comunicacions, al dintre del Conselh, se faràn obligatòriament en lenga nòstra, per que sián intelligiblas de totes.

ARTICLE 4
Cada organizacion que vòl aderir al Conselh de Representacion Generala de la Joventut d’Òc ne fa la demanda al Collègi dels representants. Aqueste verifica la conformitat dels objectius e actes de l’organizacion ambé la carta del Conselh.

ARTICLE 5
Las organizacions membres an coneissença de la carta e del règlament interior del Conselh de Representacion Generala de la Joventut d’Òc. S’engatjan a los respectar e a trabalhar dins un esperit constructiu e de dobertura.

ARTICLE 6
Cada organizacion es liura de decidir de son adesion o de sa demission, per una modalitat que deu definir en intèrne cada organizacion.

ARTICLE 7
Lo Conselh de Representacion Generala de la Joventut d’Òc pòt refusar l’entrada o expulsar una organizacion que correspondriá pas a la carta e/o al règlament interior.

ARTICLE 8
Lo Conselh de Representacion Generala de la Joventut d’Òc se compausa d’una Assemblada Generala qu’elegís un Collègi dels representants. Aqueste es l’organe decideire del Conselh de Representacion Generala de la Joventut d’Òc. Es responsable davant l’Assemblada Generala.

Aqueste Collègi dels representants elegís un Collègi executiu qu’es mandatat pel Collègi dels representants. Lo Collègi executiu a per ròtle de dirigir lo Conselh de Representacion Generala de la Joventut d’Òc en seguissent la dralha fixada pel Collègi dels representants e l’Amassada Generala. Se fa besonh, lo Collègi executiu prendrà de decisions de faiçon autonòma, mas sens traïr la volontat del Collègi dels representants e l’Amassada Generala. Lo Collègi executiu a per ròtle d’organizar las Amassadas Generalas.

Lo Conselh de Representacion Generala de la Joventut d’Òc se compausa tanben d’un Collègi consultatiu, compausat d’un delegat causit per cada organizacion. Son ròtle es de sollicitar e conselhar lo Collègi dels representants e lo Collègi executiu. En mai, cada delegat deu informar son organizacion de las reflexions e decisions dau Conselh de Representacion Generala de la Joventut d’Òc.

ARTICLE 9
La presenta carta poirà èsser modificada per l’Amassada Generala qu’amassa totes los membres de las diferentas organizacions cada an.