Conselh de la Joventut d’Òc

la plataforma de la joventut occitana
Accueil du site > Premsa, comunicats > Los comunicats dau Conselh > Presentacion e accions del Conselh de la Joventut d'Òc
  • Article

  Presentacion e accions del Conselh de la Joventut d’Òc

mercredi 27 décembre 2006

Intervencion a l’Universitat d’estiu de Nimes 8/07/2006

1/ Presentacion

- Origina e istòria

En 2003, après l’aventura “Caminatz” al dintre de l’IEO entr’autres ensages per amassar joves occitanistas, l’idèia venguèt de fargar un organ vertadièr e institucional de representacion de la joventut d’òc.
Una còla de nòu joves occitanistas de totes orizonts e representants de totas las tendéncias (IEO, Felibritge, Conselh General d’Aran, Prouvençau Lengo Vivo, Gai Saber, MED’Oc) se recampèron per, al cap de sièis meses de trabalh, prepausar un nom, una carta, un fonccionament, un reglament e d’objectius per çò que volián far espelir.

L’objectiu primièr èra de federar lo maximom de joves occitanistas al dintre d’una plataforma representativa e consensuala de las diferentas tendéncias de l’occitanisme.
Aquela estructura larga respondiá a la necessitat de portar mai naut las reivindicacions comunas a l’ensemble de la joventut occitana en li balhant mai de visibilitat e en devenent l’interlocutor privilegiat dels actors politics, economics e culturals tant al nivèl dels estats coma de las regions dels paisses d’òc.

Lo congrès fondator se debanèt al mes de julhet de 2003 a Vielha en Val d’Aran amb l’ajuda del Conselh General d’Aran.
La còla de trabalh foguèt alara dissolguda per daissar la plaça al Conselh de Representacion Generala de la Joventut d’Òc que comencèt son trabalh d’amassada.

En julhet de 2004, merces al sosten del CIRDOC, lo segond congrès se passèt a Besièrs en preséncia de mantuns elegits representants de tres euro-regions e d’autres representants de partits politics. Lo CIRDOC prepausèt aimablament d’aculhir lo sèti social del Conselh que veniá d’aquesir una vertadièra reconeissénça institucionala.
Aqueste congrès foguèt tanben marcat pel rencontre entre los joves militants del Conselh de la Joventut e los representants de l’organisacion europenca del YEN.

L’estiu 2005 vegèt lo Conselh s’amassar en congrès a Rodés per preparar en particular la protesta de Carcassona al dintre del comitat d’organisacion e en assegurar tota la promocion sul siti de l’Estivada coma dins d’autres festenals.

Lo congrès a venir se debanarà a Ais de Provença pendent la diumenjada del 14 al 16 de julhet de 2006.

2/ Las accions del Conselh de la Joventut

- Activitats

Trè sa naissença, lo Conselh de la Joventut se mainèt de botar en plaça un malhum de dialòg de trabalh e d’escambis ambe los elegits e decidaires de quines nivèls que sián, dels caps d’Estats espanhòl e francés als elegits regionals o locals del territòri occitan.

Que siá per interpelar d’unes sul problèma de la transmission de la lenga, del nombre de pòstes als concórs de recrutament d’ensenhaires, sus la politica dels transpòrtes e d’escambis dins l’espandida occitana o per condemnar lo deficit de visibilitat de la lenga dins los medias, lo Conselh de la Joventut assegura un trabalh de pression positiva cap als decidaires.

Lo Conselh òbra tanben a recampar los joves occitans a l’entorn d’eveniments esportius, culturals o festius coma de velhadas, de passejadas en montanha, de diumenjadas d’imersion, de seradas de concèrt. Atal li permet de renforçar los ligams entre joves occitanistas d’una part a l’autra dels paisses d’òc.

Lo Conselh dins sa volontat de s’adreiçar a l’ensemble dels joves vivent en Occitània es a lançar la mesa en plaça d’una granda campanha de sensibilizacion a las « malautiás sexualament transmesas » que se fariá en lenga occitana (mòstra + distribucion de preservatius « occitans » vestits per la marca Adishatz) e que seràn distribuits dins las MJC o autres centres socials e culturals occitans.

Enfin, lo Conselh de la Joventut es implicat fòrtament dins l’organisacion de las protèstas “Anèm ! Òc ! Per la lenga occitana !” als costats de l’IEO, de las Calandretas, d’Òc-bi e de la FELCO e dau Felibritge que ven de rejonher lo comitat.
Per la manifestacion de Carcassona, lo Conselh foguèt cargat de l’informacion dins mantuns eveniments culturals durant l’estiu, de la mobilisacion e de l’informacion cap als artistas occitans, de la mesa en plaça d’un servici d’òrdre e d’una presa de paraula sul tèma dels mediàs sus l’empont final.
Ongan, lo Conselh contunha son trabalh alprèp de sos partenaris per aprestar la manifestacion del 17 de març 2007 a Besièrs.

- Adesion al Youth of European Nationalities (YEN)

En 2004, lo Conselh de la Joventut d’Òc aderiguèt coma plataforma d’organisacions de joves occitans al YEN. Aquò se faguèt après una presa de contact pel biais del CIRDOC e mantuns meses de discutidas sus las condicions e los objectius de l’adesion.

Lo Youth of European Nationalities (Joves de las Minoritats Europencas) es una organisacion bèla, reconeguda al nivèl de las instàncias europencas (parlament, comission), qu’a per mission d’acapelar organisacions plataformas representativas coma la nòstra que trabalhan per la promocion e la reconeissença de las lengas e culturas sens estat del continent europenc. Son mai d’un vintenat de minoritats culturalas europencas que son representadas a l’ora d’ara al dintre del YEN. Lo YEN beneficia d’un pes vertadièr alprèp de l’Union Europenca e es membre del Forom Europenc de la Joventut. Trabalha a la reconeissença al nivèl europenc de las divèrsas nacionalitats al sens larg d’aqueste tèrme pres dins sa compausanta culturala e linguistica.

Lo Conselh de la Joventut estimèt qu’èra important d’aderir per mantunas rasons.
D’en primièr nos balhèt l’escasença de descobrir d’autras situacions plan diferentas de la nòstra e los biaisses qu’avián causit d’autres per defendre lors lengas e culturas. Trobèrem interessant de botar atal en perspectiva lo nòstre engatjament occitanista.

I trobèrem tanben una reconeissença de la part d’una organizacion plan instalada dempuèi mai de vint ans al nivèl europenc e que nos confirmèt dins la dralha qu’aviam causida.

Respondiam tanben a una damanda del YEN que se voliá raprochar de las minoritats de l’Euròpa del sud, mens representadas que las de l’airal anglo-saxon o eslave.

Enfin vesiam ben l’interest que podiá aver la joventut de lenga d’òc d’èsser representada e defenduda dins sos espers a aqueste nivèl de decision.

Es per tot aquò que lo Conselh de la Joventut d’Òc aderiguèt al YEN e acceptèt d’aculhir per Pascas de 2007 lo grand seminari annual de l’organizacion que recamparà en Gasconha 200 representants de totas las minoritats culturalas aderentas a l’entorn del tèma de las lengas per delà las frontieras.
Lo Conselh de la Joventut vòl far d’aqueste eveniment que profitarà del temps de campanha electorala una vertadièra tribuna per la defensa e la promocion de la lenga e de la cultura occitanas en França coma en Euròpa.