Conselh de la Joventut d’Òc

Aquel règlament completa la carta del Conselh de Representacion Generala de la Joventut d’Òc.

ARTICLE 1
Las organizacions membres declaran aver coneissença d’aqueste règlament interior e de foncionament e s’engatjan a lo respectar.

En cas de non respècte del règlament interior e de foncionament, s’expausan a l’exclusion del Conselh de Representacion Generala de la Joventut d’Òc.

ARTICLE 2
Las comunicacions intèrnas del Conselh de Representacion Generala de la Joventut d’Òc se fan en lenga nòstra.

Cada persona es liura d’utilizar la modalitat que vòl de la lenga nòstra.

Cada varianta de la lenga nòstra pòt èsser utilizada per transcriure los documents e comunicacions, e lo quite nom del Conselh de Representacion Generala de la Joventut d’Òc.

Eleccions dels diferents collègis

ARTICLE 3
Totes los membres de las organizacions del Conselh de Representacion Generala de la Joventut d’Òc s’amassan cada an en Assemblada Generala.

A una persona, correspond una votz, quitament s’es sòci de mai d’una organizacion.

L’Amassada Generala vòta per un Collègi dels representants :

 Totes los membres de mens de 32 ans d’organizacions aderentas al Conselh de Representacion Generala de la Joventut d’Òc pòdon votar (e se presentar) per elegir lo Collègi dels representants ;
 Cada organizacion causís las e los que se pòdon presentar, en son nom, al Collègi dels representants. Los candidats devon precisar son annada de naissença, son organizacion e sa region. Dels 26 sètis a provesir, 14 son atribuits al mai votat de cada region : Charanta, Ròse-Alps, Aran, Las Valadas, PACA, Auvernhe, Lemosin, Lengadòc-Rosselhon, Miègjorn-Pirenèus, Aquitània, Païses catalans, autre ;
 Los 12 autres sètis son atribuits als 12 mai votats que demòran.

Aquel Collègi dels representants se compausa de 21 membres ja que 5 representants son puèi elegits per formar lo Collègi executiu e quitan lo Collègi dels representants.

Una meteissa persona se pòt pas presentar que per una sola lista, quitament se fa partida de mai d’una organizacion. Sols los que son mandatats per una organizacion aderenta se pòdon presentar.

ARTICLE 4
Lo Collègi dels representants elegís demèst sos membres, un Collègi executiu compausat de 5 personas (3 co-presidents, 1 secretari, 1 clavaire) que quitan lo Collègi dels representants.

Lo Collègi executiu es responsable davant lo Collègi dels representants e l’Amassada Generala. Pòt èsser dissolgut pel Collègi dels representants se la majoritat dels membres d’aqueste estiman qu’es necessari. De novèlas eleccions se deuràn alara debanar rapidament.

ARTICLE 5
Lo règlament interior e de foncionament poirà èsser modificat pel Collègi dels representants.