Conselh de la Joventut d’Òc

la plataforma de la joventut occitana
Acuelh dau sit > Activitats > Manifestacion per l'occitan dau 17/03/2007 a Besiers (34) > La joventut d'Occitània a la manif de Besièrs lo 17 de mars
  • Article

  La joventut d’Occitània a la manif de Besièrs lo 17 de mars

dimars 20 de belier de 2007

Per la protèsta de Carcassona lo 22 d’Octòbre de 2005, i aviá fòrça joves presents. Ongan per la manifestacion de Besièrs, cal que siam encara mai nombroses! Avèm de mostrar a totes los politics e jornalistas que an previst ja de venir a la protèsta:
- que i a plen de joves que parlan occitan, que la lenga s’es transmesa doncas qu’es pas coma se ditz un afar de vièlhs e de patrimòni ;
- que la lenga sèm uroses de la parlar ;
- que sèm decidits nosautres tanben a far avançar la reconeissença de l’occitan.

Es per aquò que lo Conselh de la Joventut fa partida del comitat d’organizacion de la manifestacion, e es per aquò que lançam l’idèa de far un cortègi de joves per mostrar que :
- Sèm motivats !
- Sèm fòrça a portar la lenga !
- Sabèm far de bruch !

Es per aquò tanben que vos fasèm passar, un punt sus l’avançada de l’organizacion de la manif : las causas se precisan e aquela manif va èstre vertadierament quicòm d’enòrme!...

Mas avèm ja besonh de man d’òbra en mai... Mercés de legir aquel compte rendut e de veire ont podètz , ont volètz portar la vòstra pèira.

1 – Quantes participants i aurà ?

Nos cal èsser mai que a Carcassona, e a Carcassona èrem al mens 10 000 alara... Çaquelà per ara i a mai de busses organizats que per Carcassona a la meteissa data (a l’ora de la darrièra amassada de preparacion i aviá 31 busses de previstes). De mai de comitats locals per amassar lo monde per fin d’organizar de viatges se son creats e acaban pas de se crear (Garona nauta, Avairon, Vauclusa, Bearn.. dins pertot Occitània que !). I aurà de quites Occitans venguts de Guardia Piemontese !

Sembla que l’informacion passe plan tanben. Lo comitat d’organizacion a ja fach qualques conferéncias de premsa e non solament la premsa èra aquí e mai diguèt pas tròp de conariás ! En mai de las informacions regularas dins "La Setmana", lo jornal d’Aude "La Semaine du Minervois" publica cada setmana una mièja pagina d’informacion.

La Felco (Federacion dels ensenhaires) e Òc-Bi (pels parents d’escòla bilingua) van far un mot a cada parent d’establiment d’ensenhament bilingue per lor far sasir l’enjòc de la manifetacion.

De monde de la Val d’Aran sostenon tanben la manifestacion e vendràn. Lo comitat d’organizacion a mandat una letra de convit al Sindic d’Aran.

Los vinhairons del canton son prevenguts e deurián venir nombroses vist que son pas mal estacats a la lenga e qu’es un biais tanben de celebrar los eveniments que se passèron fa cent ans.

Enfin sabèm que i aurà de bretons que aprestan eles una manifetacion per las escòlas Diwan la setmana d’aprèp es a dire lo 24 de mars. Vendràn sosténer Occitània, a nosautres aprèp de los anar sosténer lo 24.

Dificil doncas d’avalorar lo nombre de personas que seràn aquí per manifestar lo 17 de mars. Cal sonque reténer que i aurà de plan polit monde, e que serà encara melhor amb la vòstra venguda !

2 – Detalhs practics sul debanament de la manifestacion

a – Estand del Conselh de la Joventut abans la protèsta

A la debuta de la manifestacion seràn de taulhièrs de productors e d’associacions. Lo Conselh de la Joventut aurà son taulièr. Cada associacion membre del Conselh de la Joventut aurà la possibilitat aital de far expausar de causas seunas sul taulièr.

Lo Conselh de la Joventut va vendre de tiquets a gratar per una tombolà occitana per fin de financiar en partida lo congrès de las minoritats d’Euròpa qu’organizam del 7 al 13 d’abril de 2007. Los que seguisson la formacion Calandreta al Centre Aprene an tanben fach de pegasolets per se poder comptar dins la manifestacion: dessús serà marcat « Sèm fòrça » qu’es la devisa de la vila de Besièrs e mai un numerò. Se cadun se crompa son pegasolet, sauprem a la fin quant i aviá de manifestants. Cada tiquet còsta un euro e lo benefici serà per l’organizacin de la serada de la protèsta que còsta bravament car.

Un sol punt : pels joves del Centre Aprene va èstre un brave merdièr se cal vendre los qualques 12000 tiquets. Es per aquò qu’avèm prepausat de los ajudar. Cò que seriá risolièr seriá de far una « venda a la crida » desigusats en peissonièrs per vendre junts los tiquets a gratar e los pegasolets per comptar los manifestants.

Per aquò: suggestions e ofèrta de man d’òbra seràn totes planvenguts!

b – Pendent la manifestacion

Lo Comitat d’organizacion de la manifestacion va logar dos camions sonorizats per fin de pimentar la manifestacion d’eslogans, de far una protèsta mens silenciosa que la de Carcassona. I aurà doncas d’eslogans « oficials » es a dire consensuals, puèi aprèp serà a cada cortègi de se far los seus.

"Lou Seriol" sus un camion sonorizat ?
Lo grop de las valadas occitanas "Lou Seriol" nos contactèt perque an coma projècte de venir amb un gròs camion de pes e una plataforma per poder far tot un concèrt pendent lo cortègi per ne far puei un dvd.

Lo projècte a plan d’inconvenients el nivèl practic : securitat al nivèl de la presencia d’un camion de pes al mièg de personas a pè, problèmas per passar dins las pichòtas carrièras... Lo problèma tanben es que tròp de musica amplificada tua la musica acostica. Fariá çaquelà un brave punt de raligament pels joves.

Totjorn qu’aquela question ne joslèva d’autras: la primièra es de saber quales seràn a pàuc près los gropes acostics que vendràn e la segonda es cossi los repartir dins lo cortègi per pas far una garbura tròp maichanta.

Demandam doncas a cada formacion musicala de senhalar sa venguda per fin de preveire un despart escalonat. conselhjoventut@yahoo.com...

c – Los sostens de personalitats

I a 3 biaisses de sosténer la crida « Anèm Òc » :
- en tant qu’associacion ;
- en tant que personalitat ;
- en tant qu’elegit.

Dins los tres casses, i a dempuèi Carcassona bravament de sostens. De notar entre autres Francís Cabrel, Olivia Ruiz, Massilia Sound System... La lista dels sostens se pòt consultar sul site : www.manifestarperloccitan.com

Coma sèm dins una tempsada electorala e que nos agradariá plan de veire qualques presas de posicion claras e la vertadièra presa en compte de la question de las lengas de l’Estat dins lo debat electoral, se farà una conferéncia de premsa de 11h a 12h.

Aquela conferéncia de premsa serà un temps de presa de paraula dels elegits que sostenon la crida « Anèm Òc » en preséncia dels responsables de las 6 organizacions (IEO, Calandreta, Conselh de la Joventut, Feligrige, Òc-BI, FELCO)

Atencion: Aquela conferéncia de premsa es sustot pas un meeting electoral, çò que vòl dire que los candidats a la presidéncia de la republica francesa prendràn la paraula non pas en tant que candidats mas en tant que personas elegidas. Serà lo cas per François Bayrou e Dominique Voynet per exemple que semblariá que ajan previst de venir. Per contra José Bové que auriá tanben dins l’intencion de venir es pas elegit donc pòt pas préner la paraula.

Aital los elegits que parlaràn seràn totes sus un pè d’egalitat e parlaràn de las causas que an agut l’escasença de far per las lengas e non pas de las moltissimas promessas que se pòdon far.

d – La presa de paraula en fin de percors

Coma l’an passat, de joves legiràn un tròç de tèxt dins lor dialècte per fin de far ausir la riquessa de l’Òc, puèi i aurà un discors prononciat pel comitat d’organizacion.

-> Nos demòra de trobar lo tèxte que legiràn los joves.

e - La securitat

Per assegurar la securitat dels manifestants de cap a l’exterior de la protèsta, la polícia farà son mestièr. Mas coma l’an passat, cal fargar una còla d’alentorn 80 personas per far la securitat dins lo cortègi, repartits sus diferents punts del percors e que comunicaràn per talkie walkie. D’unes joves del conselh de la Joventut i participèron l’an passat e se trobèron un pauc frustrats de pas aver vista la manifestacion.

-> Nos n’encargam pas particularament ongan mas, se i a de braces caritables que vòlon ajudar per aquò far, conselhjoventut@yahoo.com !

f – La serada (que serà plan meritada !)

Se farà a las arenas de Besièrs. Son còst es plan important: locacion del material de sonorizacion e d’esclairatge (2 emponts doncas doble de material), locacion d’un tibanèl per caber un maximum de personas a l’acés, assegurança... tot aquò monta plan lèu. Pel finançament i aurà lo benefici de la venda dels pegasolets « sèm fòrça! », mai la beguda pendent la serada....

-> E aquí tanben avèm besonh de monde... conselhjoventut@yahoo.com per las bonas volontats!

Vaquí doncas lo punt es fach. Podètz pausar totas vòstras questions a conselhjoventut@yahoo.com, mas ara anatz conéisser l’adreiça !

E ARDIT ! A lèu de se veire lo 17 de març per plan rambalhar!